Isigqoko sokuzivikela sabashayeli bezithuthuthu
Akumele ushayele isithuthuthu noma ube ngumgibeli esithuthuthwini, kwisithuthuthu esinamasondo amathathu noma amane, noma ube ngumgibeli ekalini eliseceleni eliboshelwe esithuthuthwini, emgwaqweni womphakathi, ngaphandle uma kugqokwe isigqoko sokuzivikela:
- esenzelwe ngqo ukusetshenziswa naleso sithuthuthu, futhi
- esilingana kahle nesinebhande lesilevu eliboshwe kahle ngaphansi kwesilevu.
Umshayeli wesithuthuthu kumele aqinisekise ukuthi noma yimuphi umgibeli okuleso sithuthuthu oneminyaka engaphansi kwengu-14 ugqoka isigqoko sokuzivikela esinjalo.
Umshayeli nomgibeli besithuthuthu abadingi ukugqoka isigqoko sokuzivikela uma isithuthuthu sinebhande lokuzibopha elihambisana nezidingo ze-SABS, futhi injini ingakwazi ukuhamba ngaphandle uma umshayeli nabagibeli (uma bekhona) besithuthuthu begqoke lelo bhande lokuzibopha.
Ifasitela langaphambili
Ifasitela langaphambili elicacile lemoto elula kumele:
- linike umshayeli ukubona okwanele ukuze ashayele ngokuphepha,
- libe ngoyingilazi yokuphepha, futhi
- libe nokukhanya okudlula kulo okungenani okungama-70%.
Izisuli zefasitela langaphambili
Imoto elula nesindayo enefasitela langaphambili kumele ifakwe okungenani isisuli esisodwa sefasitela, futhi lapho isebenza, kumele isule ingaphandle lefasitela langaphambili ngqo phambi komshayeli, ngokuqhubekayo, ngokulinganayo nangokwanele.
Imipayipi ethulisa umoya ophumayo
Imoto kumele ifakwe uhlelo olusebenzayo lokuthulisa umoya ophumayo, okumele:
- luvumele umoya ophuma enjinini ukuthi udlule kuleso sithulisi
- lungakhiphi umoya noma intuthu evela enjinini eminyene kangangokuthi iphazamise noma ivimbe ukubona kwabanye abasebenzisi bomgwaqo, noma
- lube sendaweni lapho uwoyela noma olunye uketshezi noma impahla evutha kalula kungeke kuconse noma kuwele kulo,
- lugcinwe kahle kangangokuthi umoya noma intuthu ephumayo ingangeni ekamelweni lomshayeli noma elabagibeli lemoto.
Imoto akumele isetshenziswe emgwaqweni womphakathi:
- ngaphandle kwesithulisi somoya ophumayo esisebenzayo.
- ngaphandle uma umoya ovela enjinini udluliswa kuleso sithulisi.
- uma umoya noma intuthu evela enjinini iminyene kangangokuthi iphazamise noma ivimbe ukubona kwabanye abasebenzisi bomgwaqo, noma
- uma umpayipi womoya ophumayo noma isithulisi saso sisendaweni lapho uwoyela noma olunye uketshezi noma impahla evutha kalula kungaconsa noma kuwele kuso, noma sibekwe futhi sigcinwe ngendlela yokuthi umoya noma intuthu ephumayo ingena ekamelweni lomshayeli noma elabagibeli lemoto.
Pass